Benjamín Lana kongresuaren zuzendari berriak aurkeztu du Leonor Espinosaren (Leo, Bogota) hitzaldia, eta esan du kongresu honetako interesgarrienetako bat izango zela, eta hala izan da, zalantzarik gabe, bai edukiagatik, bai aurkezteko moduagatik. Lanaren hitzetan, "herrialde bateko eta kontinente oso bateko belaunaldi baten pentsamoldea aldatzea lortzen duten sukaldari oso gutxi horietako bat da. Kulturaren aktibista bat da, ikuspegi guztiz disruptiboduna". Herrialde osoko osagaiekin eta baita beste zibilizazio batzuetakoekin ere "ezinezko platerak egin ditu. Eta bere herrialdeko sukaldariek Kolonbia sukaldatu nahi izatea lortu du".

Sukaldari kolonbiarrak, hitzaldiari hasiera emateko, dokumental bat proiektatu du, ‘Pozondarrak. Adjektiborik gabe’ izenekoa, zeinarekin bertaratu direnek sakonago ezagutu ahal izan baitituzte, batetik, Kolonbiako sukaldaritza eta, bestetik, herrialdearen egoera korapilatsua eta bilakaera. Dokumentalak bost sukaldari kolonbiar "liderren" bizitzaren bidez azaltzen du hori guztia. Bost emakume horiek haien bizitza nolakoa den, gatazkak nola astindu dituen eta sukaldaritzak beraientzat zer esan nahi duen kontatzen digute.

Proiekzioaren ondoren, sukaldariak hitza hartu du El Pozónen duen proiektua azaltzeko. Cartagenako auzo horrek arazo larriak ditu eta, geografikoki, gatazka armatutik oso gertu dago. "Erronka eta problematika jakin batzuk ditu, bertan bizi diren gehienak pobreziaren mugaren azpitik bizi direlako", azaldu du. "Delinkuentzia handia dago eta, dokumentalak izen hori badu, han bizi zarela esaten duzunean beti mespretxuzko adjektibo bat jartzen dizutelako da", jarraitu du.

Problematika orok bezala, baditu irtenbide posibleak: "Azpiegituretan inbertitzea, garapen ekonomikorako eta enplegurako programak, etxebizitzak hobetzea, herritarren segurtasunean inbertitzea, kalitatezko hezkuntza edo osasun arreta dira horietako batzuk", zerrendatu du. Espinosaren fundazioak, Funleo izenekoak, garapenerako gastronomia du lelo gisa, eta gizarte-ehuna indartzea du helburu, Karibeko sukaldaritza eta tokiko ekintzailetza sustatuz, jatetxe komunitario baten eta bertako produktuen azoka baten bidez. "Asmo handiko proiektua da, ongizatea ekarriko duena eta, horregatik, babes ekonomikoa bilatzen ari gara", adierazi du.

Teknikaren ordez, arima

Ponentziaren zati gastronomikoenean, Espinosak kontatu du zer jaten den El Pozónen: "Arroza askatasunaren sinbolo da Kolonbian, eta cangreja, berriz, plater identitario bat. Arroz oso desberdin bat da, karramarro-gisatuz egindako hondoa duena". Kongresukideek errezeta hori dastatzeko aukera izan dute.

Amaitu aurretik, Espinosak mezu bat helarazi nahi izan die sukaldari gazteenei: "teknika ezin da inoiz arimaren gainetik jarri". Izan ere, bere sukaldaritzak "arima du, eta sormenarekin, grinarekin eta kultura gastronomikoarekin lotzen da. Hori da, eta ez teknika, sukaldaritzaren benetako izateko arrazoia. Nire sukaldaritza-proposamenean, kultura eta tradizio gastronomikoarekiko lotura sakon hori da nagusi", esanez amaitu du.

LABURRAK

"Dokumentalak izen hori badu, El Pozónen bizi zarela esaten duzunean beti mespretxuzko adjektibo bat jartzen dizutelako da"

"Nire sukaldaritzak arima du, eta sormenarekin, grinarekin eta kultura gastronomikoarekin lotzen da”