Limako bihotzean taupa egiten du Micha Tsumuraren proiekturik pertsonalenak, Maido jatetxeak perutar eta nikkei sukaldaritzaren erabateko erreferentea mundu mailan. 15 urteko ibilbidean, sari ugari jaso ditu Maido jatetxeak. 2025Eko ekainean iritsi zitzaion orain arteko saririk garrantzitsuena: Munduko Jatetxerik Onena izendatu zuen The World’s 50 Best Restaurants-ek.

Micharen sukaldaritza zapore bizi eta, aldi berean, delikatu eta orekatuz beteta dago. Bere plateren bitartez, Peruko geografian barrena bidaiatzera, itsasoa eta Amazonia esploratzera gonbidatzen gaitu, horiexek baitira bere jakitegiaren oinarri. Munduari bere herrialdearen aberastasun kultural eta gastronomikoa erakusteko nahiak bultzatuta, «Nikkei es Perú» liburua argitaratu zuen, eta aholkulari gastronomiko gisa parte hartu zuen Netflixerako «Perú, tesoro escondido» dokumentalean.

Maido jatetxeaz gain, beste proiektu gastronomiko batzuk ere zuzentzen ditu Michak, arrakasta handiz. Liman, hiriburuko hainbat puntutan establezimenduak dituen Tori negozioa zuzentzen du; Limatik kanpora, berriz, Mai Mai Restaurant jatetxea du Panaman, eta Karai by Mitsuharu Txilen.