2016KO PROGRAMA

BOST KONTINENTE, BOST KULTURA GASTRONOMIKO ORDEZKATUTA

Lehendabiziko aldiz, sei herrialdetako chefak eta jatetxeak izango dira gonbidatuak munduko bost kontinenteen ordezkari gisa, gastronomia garaikidearen atlas handi bat marraztuz.

Sei herrialde horietako chef onenetakoak igoko dira Kursaal Jauregiko eszenatokira, beren kultura, sustrai eta etorkizun gastronomikoen berri emateko, jatorriaren eta sukaldaritzaren arabera taldekatuta. Munduko kultura gastronomiko ezberdinen erakustaldia izango da eta, horren aurretik eta ondoren, bertako sukaldaritzaren izen handiek osatuko dute kongresua, betiere kongresuaren berezko ezaugarri bereizgarria den formularekin: auditorioan dagoen jendeak eszenatokian aurkezten diren platerak zuzenean dastatzeko aukera izango baitu. Angel Leon, Mario Sandoval, Joan Roca, Paco Morales, Ramon Freixa, Carme Ruscalleda, Diego Guerrero, Eduard Xatruch eta Oriol Castro, Marcos Moran, Sergio eta Javier Torres eta Paco Perez sukaldariek baieztatu dute dagoeneko etorriko direla.

Jarraitu beharreko chefa… Ponentzia formatu berria eta liluragarria Auditorioan, San Sebastian Gastronomikak etorkizunaren aldeko apustu indartsua egiten duela erakusten duena. Berezko estiloa sortzeko eta arrakasta lortzeko ezaugarriak dituela uste dugun chef bat –nazionala edo nazioartekoa– eszenatokian “deskubrituko” dugu zuzenean.

Goi-mailako gastronomiako topaketen artean mundu mailako erreferentzia den San Sebastian Gastronomika kongresua astelehenetik asteazkenera ospatuko da aurten ere; hala ere, aurreko egunean, igandean, jardunaldi herrikoia izango da. Igandea izango da jendeak doan sartzeko aukera edukiko duen egun bakarra, eta jarduera ugari egongo da hiri osoan zehar. Gainera, Off atalean, chef, ekoizle eta bezeroen arteko topaketak egingo dira petit comitean, eta ardoek ere beren tokia izango dute Wine Sessions saioetan. Bestalde, street food janariaren hauta onenak jauregiaren inguruak hartuko ditu hiru egunetan zehar.

Ostalaritzako enpresari eta profesionalei zuzendutako Sinergia jardunaldi esklusiboaren bigarren edizioa ospatuko da aurten, eta topagune eta networkingeko gune gisa finkatuko da, hitzaldi eta topaketa esklusiboen bitartez. Market atalean izango du jarraipena enpresa-lanak; aurten ere, nazio zein nazioarte mailako produkturik onenak egongo dira hantxe, alde guztietatik sektoreko joera berrienak erakustera etorritako erakusketariekin.

Bost kontinenteak, bost kulturak

Amerika. Etorkizun handiena duten herrialdeetako batek izango du protagonismoa: Brasilek, hain zuzen ere. Hango sukaldaritza exotikoen ikuspegi panoramikoa, hango chef ameslarienek azalduta.

Afrika. Kontinenteko intentsitate gastronomiko garaikide handieneko herrialdeak ordezkatuta: Hegoafrikak, hain zuzen ere. Sukaldaritza ezezagun eta harrigarria, modernitatearen eta antzinako joeren hibridazio txundigarria, sustraitua eta fusionatua.

Ozeania. Australia, ikuskizun handia. Asia hegoaldeko interpretazio pertsonalak, sukaldaritza sustraituak, aborigenak, Antipodetako floran eta faunan oinarritutako ez-ohiko bilakaerak. Eklektizismoa muturrera eramana.

Asia. Mundua maitemindu duen sukaldaritza: Japoniakoa. Hango chef bikainenen bitartez adieraziko den kontakizuna, neotradiziotik hasi eta infinituraino. Nazioarteko izar handien zerrenda oparoa, bai eta kultuko azken guruena ere.

Europa. Europako fenomeno berrien bila, hainbat sortzen ari diren eta azentu eta intentsitate ezberdineko alderdi berritzailetatik erakutsiko du kontinentea kongresuak. Turkiak Europa eta Asiaren arteko bidegurutze gastronomikoa ordezkatzen du. Turkiar sukaldaritza –casual food delakoaren mundua konkistatu duten bere espezialitate batzuengatik bakarrik ezagutzen dena– historia aberatsaz eta sukaldaritza zabal eta anitzaz loratzen ari da. Hungaria ere sukaldaritzan azkar bilakatzen ari den beste herrialde bat da, Ekialdeko herrialdeetan sukaldaritza progresiboena duena. Modernitatera eramandako tradizioen melange bat, gastronomia ezberdin, harrigarri eta zirraragarri bat sortuz.

SAN SEBASTIÁN
GASTRONOMIKA,
MUNDU MAILAKO
ERREFERENTZIA
GOI MAILAKO
GASTRONOMIAKO
TOPAKETETAN

GASTRONOMIKA


Sukaldaritza munduko erreferentziazko hitzordu honetako hizlarien zerrenda osatu da eta izena emateko aldia irekitzera doa, XVIII. edizioan programatu den sukaldaritza arloko mundu-mapara etortzeko aukera izateko.

Bost kontinenteetatik etorritako 40 chef baino gehiago, asko eta asko nazioartean sarituak, izango dira Kursaaleko eszenatokian Gastronomika berezi honetan, Donostiaren Kultura Hiriburutzarekin bat.

DONOSTIA,
16 MICHELIN
IZAR DITUEN
HIRIA,
MUNDUKO
KONTZENTRAZIORIK
HANDIENA
METRO
KOADROKO

12.900 BISITARI


Nazioarteko chef ezagunek eszenatokian prestatutakoa dastatzeko aukera dagoen sukaldaritzako kongresu bakarra da